Mindat Khuapi Ah A Um Mi SAC Ralkap Pakhat Cu CDF-Mindat Sin Ah Aa Ap.Chinram, Mindat khuapi ah a um mi SAC ralkap pakhat cu hramhram in nawlngeihnak a latu SAC ralkap rianṭuannak duh lo in pau dohthlennak ah i tel ve ding in a luancia May 5 ni ah khan Chin Defence Force – Mindat sin ah aa ap.
Mindat khuapi hrambunh Khah-Lah-Yah 274 ah rianṭuanter mi Kyaukhtu khuapi hrambunh Ah-Mah-Tah 368 Battalion in pumpak No.Ta/206455 Corporal Win Lay nih cun MA-3 pakhat, kuanbawm 3, meithal kuan 256 i put in CDF-Mindat sin ah aa ap caah CDF-Mindat nih tangka Kyats sing 50 an pek.
Chin Defence Force-Mindat sin ah CDM tuah in pau dohthlennak ah aa tel mi cu lunglawm tein kan cohlan hna i hriamnam he aa ap mi cu tangka kan pek hna leng ah a himnak hmun an phak tiang ṭuanvo kan laak hna, tiah CDF-Mindat nih cun an thanh.
Thawngpang Dang Rak Rel Chih :Chinland Defense Force – Kalay Kabaw Gangaw In Ralkap 4 Nih Ram Ca Ah Nunnak An Pek.Chinland Defense Force – Kalay Kabaw Gangaw in ralkap 4 cu kahdohnak ah an nunnak a liam, tiah CDF-KKG nih nihin May 8 ah an thanh.
Chinland Defense Force – Kalay Kabaw Gangaw Battalion 7 in Platoon Commander Dal Sin Mung le Battalion 4 ralkap Nay Lin Aung cu a luancia May 2 le May 4 ni ah ralram hmun pakhat ah an nunnak a liam.
Cu bantuk ṭhiamṭhiam in Chinland Defense Force – Kalay Kabaw Gangaw Battalion 5 ralkap Aung Tun Lin le Battalion 4 ralkap Ya Ya Kam cu a luancia May 6 le May 7 ni ah ralram hmun pakhat ah an nunnak a liam, tiah CDF-KKG nih cun an thanh.
Chinland Defense Force – Kalay Kabaw Gangaw ralkap Dal Sin Mung, Nay Lin Aung, Aung Tun Lin le Ya Ya Kam nih pau dohthlennak ca ah an nunnak an pek mi cung ah CDF-KKG nih upatnak sang bik kan pek hna, kaltak mi chungkhar kan in tuarpi hna i nan ngaihchiatnak kan i hrawm, tiah CDF-KKG nih an langhter.
Rak Rel Chih :Myanmar Ram Hmun Kip Ah SAC Ralkap Ruang Ah Innlo Chuahtak In Hartong Mi Nuai 3 Leng An Phan.Myanmar ram ah a cang cuahmah mi kahdohnak ruang ah innlo chuahtak in a zaam i hartong mi nuai 3 leng an phan, tiah UNOCHA nih nizan May 5 ah an thanh.
Innlo chuahtak in a zaam mi hartong zat hi thla 6 leng chung ah zatuak 50 an karh i a zualhma ngai mi dirhmun a si. A zaam mi nuai 3 chung ah nuai 2.7 leng cu kahdohnak a fah tuk ruang ah a zaam mi an si i cheu thum ah cheu khat cu ngakchia an si hna, tiah UNOCHA nih an langhter.
Kahdohnak a fahnak hmun Myanmar ram chaklei Chinram, Sagaing ramṭhen le Magway ramṭhen in innlo chuahtak in a zaam mi zat cu nuai 1.5 hrawng an si. Karenni ramkulh, Bago ramṭhen, Karen ramkulh, Shan ramkulh thlanglei, Mon ramkulh le Tanintharyi ramṭhen in minung 900,000 nih an innlo an chuahtak ve. Cu pin ah Rakhine ramkulh in innlo chuahtak in ral a zaam mi minung 356,000 leng an si, tiah UNOCHA nih an langhter.
A liamcia 2023 October thla donghlei in SAC ralkap nih vanlawng in kahdohnak tuah in bomb an thlak lengmang ruang ah innlo chuahtak in ral a zaam mi an karh tuk, tiah UNOCHA nih an thanh i Myanmar ram ah minung nuai 18.6 hrawng ah har an tong caah minung hawi cung zawnruahnak he bawmhchanh an herh ngaingai, tiah UNOCHA nih cun an langhter.Credit : The Chin Post
Leave a Reply