Breaking News: Abiapi Taktak Mi Myawaddy Khuapi Ah Kahdoh Bawm Ding In A Kal Mi SAC Ralkap Pawl

Myawaddy Khuapi Ah Kahdoh Bawm Ding In A Kal Mi SAC Ralkap Pawl Cu An Kah Hna I Thi Le Hliam 100 Hrawng An Um. KNLA hruainak in tualchung hriamtlai ṭangṭi phu nih an laak mi Karen ramkulh, Myawaddy khuapi ah kahdoh bawm ding in a kal mi SAC ralkap pawl cu a luancia April 12 ni ah rak bawh in an kah hna i SAC ralkap thi le hliam 100 hrawng an um, tiah KNU chimnak nawlngei Padoh Saw Taw Nee nih Reuters ah a chim.

“Hika rat ding cu thil awl a si lo, harnak tampi an tong ko lai, kan ralkap pawl nih an bawh hna i an kham ko hna. Cu pin ah SAC ralkap nawlngeihnak a hram bongh ding ah KNLA le tualchung hriamtlai phu dang pawl tonbiaruahnak le ceihmainak pehzulh in kan ngei cang,” tiah Padoh Saw Taw Nee nih cun a chim. SAC ralkap thirkham motor pakhat le motor dang pakhat zong KNLA ṭangṭi phu nih an hrawk dih, tiah theih a si.

Myawaddy peng Thingannyinaung sakhan ah aa thlai mi SAC ralkap thantar zong nizan April 15 ni ah KNLA ṭangṭi phu nih an khangh i KNU thantar an thlai kong Thailand hrambunh Media pakhat a si mi The Reporters nih an langhter. The Chin Post

Thawngpang dang: Mizoram ramkulh, Siaha khuapi in Chinram, Thantlang peng, Vuangtu khua lei ah khualtlawng mi 17 nih an i cit mi Pickup motor cu Lungbun le Tipi karlak an phak 2024, April 13 zanlei sang ah Accident a tong, tiah theih a si.

“Siaha khuapi in kan rak chuak i ramri um tiva kan phak hlan Lungban le tiva karlak kan phak zanlei suimilam 5:30 tluk ah atu bantuk in kan motor aa lehsual hi a si, motor Brake a ṭhat lo ruang ah a si i Pu Mang Cung (kum 50) hrawng cu hmakhat te ah a nunnak liam” tiah motor aa cit ve mi Vuangtu khua mi pakhat nih a chim.

Motor aa cit mi dihlak hi minung 17 kan si, mah lak ah kum 1 leng ngakchia 1 le kum khat hmanh a tling rih lo mi ngakchia 1 zong an i tel i minung 9 nih hliam an tuar. Hliam a tuar mi hna cu Siaha khuapi sii-inn ah an kalpi hna i hliamhma faak deuh mi 3 hna cu Aizawl khuapi sii-innpi ah an lanhpi hna, tiah a chim chap.

Motor Accident nakin nunnak liam mi Pu Mang Cung hi hlaphuah le hlasak lei zong ah bochan ngai mi a si i April 14 ah a ruak cu a chuahnak Vuangtu khua ah an vui, tiah theih a si. Lungmili Post