Nihin April 15 ah Chin ramkulh,Hakha rungtlang SAC hmunpi ah Quantum Project in CDF-Hakha,Thantlang,Zophei le Lautu hna ibawm in Drone in bomb lung thum kan thlak tiah CDF-Hakha nih an thanh. Cuti bomb thlaknak ah SAC lei in a thi le hliam an um tiah thawng kan theih i a dikthliar cu hnu ah kan thanh te lai tiah an langhter.
Chinland ral teinak caah Rungtlang hi tei a herh caah Rung Operation zong kalpi cuahmah a si i ramchung ramleng mizapi ttangti dingin sawnnak an tuah i SAC le a minung hna cu ho hmanh hnangam tein dinh caan kan pe hna lai lo i a rauh hlan ah kan tei lai tiah an langhter chih.Crd:CBN News
Thawngpang dang: Mizoram ramkulh, Siaha khuapi in Chinram, Thantlang peng, Vuangtu khua lei ah khualtlawng mi 17 nih an i cit mi Pickup motor cu Lungbun le Tipi karlak an phak 2024, April 13 zanlei sang ah Accident a tong, tiah theih a si.
“Siaha khuapi in kan rak chuak i ramri um tiva kan phak hlan Lungban le tiva karlak kan phak zanlei suimilam 5:30 tluk ah atu bantuk in kan motor aa lehsual hi a si, motor Brake a ṭhat lo ruang ah a si i Pu Mang Cung (kum 50) hrawng cu hmakhat te ah a nunnak liam” tiah motor aa cit ve mi Vuangtu khua mi pakhat nih a chim.
Motor aa cit mi dihlak hi minung 17 kan si, mah lak ah kum 1 leng ngakchia 1 le kum khat hmanh a tling rih lo mi ngakchia 1 zong an i tel i minung 9 nih hliam an tuar. Hliam a tuar mi hna cu Siaha khuapi sii-inn ah an kalpi hna i hliamhma faak deuh mi 3 hna cu Aizawl khuapi sii-innpi ah an lanhpi hna, tiah a chim chap.
Motor Accident nakin nunnak liam mi Pu Mang Cung hi hlaphuah le hlasak lei zong ah bochan ngai mi a si i April 14 ah a ruak cu a chuahnak Vuangtu khua ah an vui, tiah theih a si. Lungmili Post
Leave a Reply