Israel Nih Iran Lakah Lehrulhchamnak Tuah A Timh Ning. Israel ramchung ṭuanvo ngeitu Vuancibu 5 hna nih suimilam 3 chung tluk tonbiaruahnak an ngeih hnu ah Iran cungah Lehrulhchamnak tuah an duhnak kong cu an chim dih nain “a ni caan le cawlcangh ning” konglam ah a fekmi biakhiahnak zeihmanh an tuah kho rih lo, tiah theih a si.
Israel nih Iran lehrulhchamnak dingah lam 2 in timhlamhnak an ngei, Hriamnam hmang in kahdoh (military response), ran cozah he pehtlaihnak phihkhar (diplomatic options)
Hi kong he pehtlai in Benny Gantz war Cabinet bawi ngan nih a chimmi cu hriamnam hmang in lehrulhchamnak tuah khawh a si lio caan ah,
President Joe Biden nih Prime Minister Benjamin Netanyahu cu lehrulhnak zeihmanh tuah lo dingin a nawl caah a tubantuk in zeihmanh an tuah khawh lonaak hi a si, tiah a chim.
Israel nih Iran lakah lehrulhchamnak tuah loin caan sau a um si ahcun “Vulei pumpi” nih bawmhnak an peek mi le an dirpi hnanak hi a ṭumchuk lai, tiah a thinphan naak kong a chim chap.
A tubantuk in President Biden nih Netanyahu sin ah lehrulhchamnak tuah lo dingin a nawlnak a ruang cu ramkhat le ramkhat kahdohnak um lio caan a si caah ralpi 3 naak a chuak sual lai ti a phan caah a si, tiah Media cheukhat nih an langhter ve.
Thawngpang dang: Mizoram ramkulh, Siaha khuapi in Chinram, Thantlang peng, Vuangtu khua lei ah khualtlawng mi 17 nih an i cit mi Pickup motor cu Lungbun le Tipi karlak an phak 2024, April 13 zanlei sang ah Accident a tong, tiah theih a si.
“Siaha khuapi in kan rak chuak i ramri um tiva kan phak hlan Lungban le tiva karlak kan phak zanlei suimilam 5:30 tluk ah atu bantuk in kan motor aa lehsual hi a si, motor Brake a ṭhat lo ruang ah a si i Pu Mang Cung (kum 50) hrawng cu hmakhat te ah a nunnak liam” tiah motor aa cit ve mi Vuangtu khua mi pakhat nih a chim.
Motor aa cit mi dihlak hi minung 17 kan si, mah lak ah kum 1 leng ngakchia 1 le kum khat hmanh a tling rih lo mi ngakchia 1 zong an i tel i minung 9 nih hliam an tuar. Hliam a tuar mi hna cu Siaha khuapi sii-inn ah an kalpi hna i hliamhma faak deuh mi 3 hna cu Aizawl khuapi sii-innpi ah an lanhpi hna, tiah a chim chap.
Motor Accident nakin nunnak liam mi Pu Mang Cung hi hlaphuah le hlasak lei zong ah bochan ngai mi a si i April 14 ah a ruak cu a chuahnak Vuangtu khua ah an vui, tiah theih a si. Lungmili Post
Leave a Reply