SAC Ralkap Hriamngan Ruang Ah Kalay Peng Ah Tualchung Mi Pathum Nunnak A Liam.Sagaing ramṭhen, Kalaymyo chaklei, Pyintawu ah SAC ralkap nih nihin April 25 chun ah hriamngan an kah ṭhan i Nyaungkone khua mi pahnih nunnak a liam.
Nizan April 24 zanlei ah SAC ralkap hriamngan kah mi ruang ah kum tling lo ngakchia pahnih telh in tualchung mi pathum an thih tan ah hliam a tuar mi nu pakhat zong nihin ah a nunnak a liam ve.
Nihin i a thi mi hna cu Khup Tuang Kim(kum 26), Piang Khanh Sum(kum 30) le Pi Cian Ngeih Khawl(kum 40) hna an si i, Piang Khanh Sum le Khuap Tuang Kim cu nizan April 24, ruak an thlah lio ah SAC ralkap hriamngan kah mi khennak in an nunnak a liam, tiah an chim.
Nihin hriamngan kahnak ruang ah tualchung mi cheukhat hliam a tuar mi an um i a hliam mi zat fiang in hngalh a si rih lo. Nizan April 24 le nihin 25, ni hnih chung lawng ah SAC ralkap hriamngan kahnak in Pyintawu khua mi 6 nunnak a liam.
SAC ralkap pawl cawlcanghnak ruangah Kalay peng ah hin a luancia February 21 in April 21 tiang thla hnih chung ah kum tling lo ngakchia telh in tualchung mi 80 nunnak a liam cang, tiah Kalaymyo People’s War committee nih an thanh.
Thawngpang Dang Rak Rel Chih :SAC Ralkap Hriamngan Kahnak In Kalay Peng Pyintawu Khua Mi Kum Tling Lo Ngakchia Pahnih Le Tarpa Pakhat Nunnak A Liam.Sagaing ramṭhen, Kalaymyo chaklei, Pyintawu khua cu SAC ralkap pawl nih hriamngan in an kah i kum 10 hrawng ngakchia pahnih le kum 60 leng tarpa pakhat nunnak a liam, tiah tualchung mi nih an chim.
“Nizan April 24 zanlei ah rallam sial mi SAC ralkap nih Nanchaung in Pyintawu khua ah timh ciammam tein hriamngan an kah, atu hi Kalay peng chaklei ah SAC ralkap pawl pehzulh in rallam an sial cuahmah,” tiah tualchung mi pakhat nih a chim.
Hriamngan an kah hnu ah inn 300 hrawng a umnak Nanchaung khua cu an khangh i inn zeizat dah a kangh ti mi cu hngalh a si rih lo.April 22 ni zong ah Kalay peng Yaukchokwin in Tedim peng Mainuai khua ah ralzaam in aa dor mi kum 67 tarnu cu SAC ralkap kah mi hriamngan nih a khen i a nunnak a liam, tiah tualchung mi nih an chim.
Kalay peng chaklei ah SAC ralkap nih April thla hramthawk in hmunram thianhfelnak kan tuah lai tiin rallam sial in khua kip ah ah an lut i inn tam ngai an khangh cang.RFA nih an khawmh mi cazin ning ah SAC ralkap hriamngan le vanlawng kahnak ruang ah tukum 2024 January thla hramthawk in March thla dongh tiang ah Myanmar ram hmun kip ah tualchung mi a thi mi 397 an si i, hliamtuar mi 889 an um.Credit : The Chin Post
Leave a Reply