Hramhram in nawlngeihnak a latu SAC ralkap chung ah Vice Chairman a ṭuan mi Senior General Soe Win cu mizapi sin ah aa langh ti lonak nihin April 23 in ni 20 a si cang.
Voi dang tawn bantukin thla fatin tuah tawn mi SAC tonbiaruahnak cu SAC Chairman le Vice Chairman hruainak in tuah a si tawn nain nizan April 22 zinglei ah tuah mi SAC tonbiaruahnak ah cun Vice Senior General Soe Win aa tel ti lo.
Nizan April 22 zinglei ah tuah mi SAC tonbiaruahnak ah cun Senoir General Min Aung Hlaing lawng nih a hruai hna i cinthlaknak, kokek puicimh, fimcawnnak le zaanglek kong ceihmainak an ngeih kong SAC Information nih an thanh.
April 8-9 ah Mon ramkulh, Mawlamyine khuapi hrambunh nithlak thlanglei Division Headquaters(Yah-Tah-Khah) cu Drone in an rak kahdoh hnu in Vice Senior General Soe Win cu nihin tiang mizapi sin ah aa langh ti lo.
Cu kahdohnak cu Alpha Bats Drone Force nih an kalpi mi a si i Vice Senior General Soe Win telh in Division Headquaters in ralbawi cheukhat hliam an tuar kong April 9 ni ah Alpha Bats Drone Force nih an thanh. Ramkhel lei a thiam ngai mi U Thein Soe Naing nih cun, “Drone kahdohnak ah hliam a pu i cucaaah Soe Win cu mizapi sin ah a langh ti lonak a si,” tiah RFA a chim.
SAC chimnak nawlngei Major General Zaw Min Tun nih cun, “Vice Senior General Soe Win cu voi dang kel in a rian a ṭuan ko,” tiah a luancia zarh chung ah Media sin ah a chim ve.
Vice Senior General Soe Win kong he pehtlai in a luancia April 3 ni ah tuah mi Bahtoo khuapi i ralkap training an dih lawmhnak a kal cu SAC Information nih a donghnak bik an langhter a si. The Chin Post
Thawngpang dang: Chief Minister Pu Pa Thang hruai mi Chinland cozah upa hna cu 2024, April 13 in 19 tiang Zophei hmunram, Lautu hmunram, Zotung hmunram le Senthang hmunram khuakhangtu bu hna le tualchung mi hna cu tonnak an ngeih hna i hmunram (pengtlang) uknak kong, cozah rianṭuannak ca ah a herh mi le Chinland cozah kong he pehtlai in biaruahnak an ngeih hna, tiah Chinland cozah nih an thanh.
“Chinland cozah le hmunram (pengtlang) khuakhangtu bu karlak pehtlaih khawhnak ding caah Federal phunglam ning in pengtlang (pengtlang) uknak phung ser i cu ning cun uknak kalpi a herh nakkong, Chin miphun hna nih kan ngeih bal lo mi mahte uknak kongah kanmah tein kan ser mi phunglam cu atu ahcun Chin miphun hna nih kan fehter khawh cang nakkong, Chinland Cozah cu mizapi he hmunkhat ah dir in Chinram le Chin miphun hna zawnruahnak he ukhruainak an kalpi lai nakkong, mizapi nih Chinland cozah a ṭhawn khawhnak ding ah dirkamh a herh nakkong cu” Chinland Chief Minister nih a chim.
An khualtlawnnak ahcun Chinland cozah in Minister of Humanitarian Affairs and Rehabilitation, Minister of Home Affairs le Minister of Construction hna zong an i tel ve, tiah an langhter chih.
Leave a Reply