Lawmh A Um Kho Tuk Ee: Japan Um Mi Chitlay Chin Chungkhar Nih Vakok-PDF Bak Kyats 500,000 Bawmhnak An Pek Hna

Japan Um Mi Chitlay Chin Chungkhar Nih Vakok-PDF Cu Uniform Cawknak An Bawmh Hna. Japan ram ah a um mi Chitlay Chin chungkhar nih Vakok-PDF ralkap pawl Uniform cawknak ca ah tiin tangka Kyats 500,000 bawmhnak an pek hna.

SAC ralkap nawlngeihnak ṭha lo a hram bongh ding le Federal Democracy ramkomh sernak ca ah ruahchannak nganpi he dohthlennak a tuahtu Vakok-PDF ralkap Uniform cawknak ca ah Japan ram ah a um mi Chitlay Chin chungkhar nih bawmhnak pek mi cu tlamtling tein kan hmuh i kan i lawm tuk hringhran, tiah Vakok-PDF nih bawmhnak petu Chitlay Chin chungkhar sin ah lawmh bia an chimnak cu cathanh in an langhter.

A liamcia 2023 October thla zong ah Japan ram ah a um mi Chin mino Chin Brother’s FC nih CNF/A cu tangka Kyats 7,000,000 bawmhnak an rak pek hna i, 9 December 2023 ni ah CNF/A nih Chin Brother’s FC sin ah lawmhbia an chim kong Chin Brother’s FC in ṭuanvo ngei pakhat nih The Chin Post ah a chim.

Chin Brother’s FC cu Japan ram ah a um mi Hakha, Thantlang mino pawl nih an dirh mi a si i CNF/A ca ah biatak tein aa zuam mi an si kong le hi hnu pinlei zong ah CNF/A sin ah bawmhnak pek an i timh kong cu Chin Brother’s FC in ṭuanvo ngei pakhat nih cun a chim. Chin Brother’s FC chungtel pumpak in CDF-Thantlang ca ah bawmhnak an pek cang kong zong a chim chih. The Chin Post