Dohthlengtu ralkap phu komh nih Hpapun hrambunh LIB-434 battalion an laak. Karen ramkulh, Hpapun khua hrambunh LIB-434 SAC ralkap battalion cu dohthlengtu ralkap phu komh nih an laak i hriamnam tampi zong an laak khawh tiah theih a si.
April 25 zinglei ah Karen miphun hriamtlai KNLA, PDF, Force for Federal Democracy-FFD le BPLA i bawm in an laak mi a si tiah NUG, Runvennak Minister Zung nih a thanh.
Hpapun operation cu 2024 March 19 in an rak thawk mi a si i, March 24 ah Hpapun khuachung palek sakhan le outpost pawl an rak laak khawh.
March 30 ah Hpapun khua hrambunh IB-19 SAC ralkap battalion cu an rak laak cang i, hriamnam kuanzen tampi zong an laak.
Hpapun khua hrambunh ṭhiam ṭhiam a si mi LIB-340 battalion zong an kah cuahmah lio a si tiah NUG, Runvennak Minister Zung nih a langhter. The Hakha Post
Thawngpang dang: Joshua Van nih amah pumpak Facebook page ah aa thong ding Tatsuro Taira he an hmanthlak a tar i ” A ra lai mi puai ca min kan thut cang” tiah April 25 ah a fan pawl theihternak a tuah.
Joshua Van hi a luancia April 6 ah Brasil miphun Lucas Rocha he an thong ding an si nain an puai a rawh caah Tuluk miphun Su Mudaerji he thongh ding in puai a um ṭhan. Cu puai zong ah Tuluk pa nih a chuahtak caah a rawkk ṭhan. Atu ah Japan miphun Tatsuro Taira he puai a um ṭhan hi a si.
Iridium Sports Agency nih a langhter ning ah June 1 ah an tuah ding mi UFC 302 ah Joshua Van le Tatsuro Taira an thongh ter hna tiah an langhter. Iridium Sports Agency hi Tatsuro Taira a tawlrel piaktu Agent Company a si.
Tatsuro Taira hi kum 24 a si i puai 15 chung ah puai 15 ning in teinak a hmuh leng ah UFC Flyweight rank ah No. 12 a phan mi a si.
Cun Tatsuro hi 5′ 7″ a sang i a kut hi 70″ a sau. Joshua Van zong rank tahnak chung phan kho ding in aa zuam cuahmah lio a si i a thongh ding pa hi ni 37 aa duh ah puai an timh mi a si caah Joshua Van nih a tei kho lai maw ti hi hngahlang ngai a si. The Chinland Post
Leave a Reply